曹仁超投資哲學

睇左本書，入面列左信報專欄作家曹仁超o既投資哲學：
A. 不要趁低買入，因為你唔知幾時才係最低，寧買當頭起，莫買當頭跌。
B. 永遠記住行使止蝕，防止小損失變成大損失。
C. 買賣前先做功課。
D. 財富係透過逐小逐小累積起來的，唔好期望一朝發達。
E. 冇必勝o既投資但有必勝o既策略。

其實係投資界，賺錢真係唔難，尤其係呢幾排個股市升到彭彭聲，一個月搵一萬幾錢完全係容易(當然，大前題係你有返十萬八萬本錢)。但係，當牛市過去，熊市來臨時，要守住你賺到o既錢就非常困難。

曹仁超話..市場係公平，有腦o既人有錢，冇腦o既人冇錢，而當冇腦o既人有錢時，咁市場機制會出動，將d 冇腦但係又有錢o既人o既錢拎走。而當牛市高峰期，大家其實係度玩緊鬥傻遊戲，一個傻瓜用高價去買一隻股票，希望有另一個傻瓜比佢更加傻會用更加高價去同佢買呢隻股票。

好同意財富係累積返唻，一朝發達o既通常到最後都變返窮人，只有認認真真咁每個人儲返幾千蚊，再透過投資去令呢幾千蚊增值，咁先會成為富人。三十年儲一千萬其實一d 都唔難，每個月儲兩千蚊已經搞掂(當然，唔係儲係銀行)，但係數係咁計，又有幾多人會真係咁做？

自己早半年做左個三十年每個月儲兩千蚊o既計劃，同d 朋友講，個個都覺得好長。但係，望住阿爸阿媽，佢地養左我都差唔多三十年，諗下諗下，其實三十年好快過，我好怕三十年後會好似佢地咁，錢就冇乜，但係負債就一堆堆，唔想好似佢地咁，唯有而家開始老老實實咁每個月儲返兩千蚊，跟住再儲五萬蚊本錢唻買股票，目標係搵到d 二線股，希望五年可以升值十倍..(例如大家熟悉o既Esprit 思捷環球，三年間由12蚊升到80蚊..)

賺錢大計

早幾日同個 friend 傾開賺錢大計，講開有人高收入但低資產，又有人低收入但高資產。

見過有人六七千蚊一個月，但儲埋儲埋都儲到四五十萬，
又見過有人二三十萬一個月，但銀行儲蓄唔夠十萬。
我一向認為，重要O既唔係你賺到幾多，而係你留得低幾多！

見過有人，搵七八千蚊時洗七八千，到佢搵到萬六七蚊時，又係洗萬六七蚊。呢D 人，其實根本人工冇加到，可能只係佢生活質素好左，但係唔代表錢會多左。

自己成日諗點樣賺第一桶金(第一個一百萬)，諗左好多方法，搞生意，炒股票，炒樓，過大海，等等等等，但係後來發覺，原來第一桶金唔係要賺返唻，而係要儲返唻。

比你賺到五十萬一個月，如果一毫子都儲唔到，咁一世都冇可能有一百萬。
反之，如果每個月搵到二三萬蚊，只要儲到一萬蚊一個月，咁大約六七年就可以有一百萬。
其實，關鍵唔係你搵幾多，而係你剩到幾多。

始終，第一個一百萬都係幾緊要...計過條數，如果十年儲到一百萬，咁如果三年可以一個double，一百萬變二百萬，跟住三年又變四百萬，過多三年又變八百萬，再過多三年就成為千萬富翁，到時都只係四十幾歲，跟住就可以買返幾層樓每個月收幾萬蚊租，咁就可以過世啦！哈哈哈哈！

好！發夢完畢，先度下點樣十年儲一百萬先！